Kinsay kurog ni Lascañas?
Klaro nga nahasol ang pamunoan ni Presidente Rodrigo Duterte sa nag-ung-ong nga testimoniya ni SPO3 Arturo Lascañas. Nga nangangkon nga usa sa mga pangu sa Davao Death Squad (DDS) ug nilambigit ni Presidente Rodrigo Duterte sa pagpamatay di lang sa suspitsadong mga kriminal kon dili hasta na sa iyang politikanhon ug personal nga mga atraso.
Ang kalit nga lahugay sa Senado mao lang ang labing uwahi nila nga panagang. Nag-una nang pasidaan ni Solicitor General Jose Calida pagkiha ni Senador Antonio Trillanes IV tungod sa paghatag ug seguridad nilang Edgar Matobato ug Lascañas.
* * *
Mas nag-una ang pagkisikisi ni Senador Alan Peter Cayetano. Kinsa nisalikway sa iyang mga kawsa sa pagtunglo sa kabangis sa diktadura ni anhing Presidente Ferdinand Marcos ug pagpasangil og lapad nga kahiwian sa pamunoan ni kanhi Presidente Gloria Macapagal-Arroyo ug nitingob na sa iyang atensiyon pagdupa ni Duterte.
Sa iyang way kinutoban nga suplay sa bisan unsang mga argumento nga makapalambo sa iyang baruganan, sama sa iyang pagluba sa diwa sa EDSA People Power Revolution ug pagpahumot sa laktod nga mga pagpama-tay sa gubat batok sa ilegal nga drugas, nidangop si Cayetano sa teknikalidad.
* * *
Matod niya di mahimong paminawon ang inusab nga testimoniya ni Lascañas kay:
• Di kaablihan pagbalik ang imbestigasyon sa DDS nga gitak-opan na sa Senate Justice Committee ni Senador Dick Gordon pinaagi sa Senate Public Order Committee ni Senador Ping Lacson;
• Mauwawan ang Senado kon ipadayon ang imbestigasyon bisan nahukman nang way DDS ug nga way labot si Duterte sa extrajudicial killings (EJKs); ug
• Di tradisyon sa Senado ang paghimo og botasyon sa di pa himuon ang imbestigasyon.
* * *
Gitakda nang Lacson, nga usa sa arkitekto pagpalagpot sa mga senador sa Liberal Party sa majority bloc, ang subling pag-atubang ni Lascañas sa Senado karong Lunes. Gawasnon bang pakisusi o gamiton lang pagpakauwaw ni Lascañas ug pagkuwestiyon sa tanan niyang pangangkon?
Di mapalagpot si Duterte ni motibugsok ang popularidad sa gubat sa drugas human sa testimoniya ni Lascañas. Apan ang pagsubli ni Lascañas sa iyang mga pasangil atubangan sa kalibotanong media igo nang makatay-og sa mga nagtungkawo sa gahom nga kumbinsidong way makabaraw sa ilang kahawod.
- Latest
