Kapwa akusado ni De Lima, sumuko sa NBI
MANILA, Philippines - Kusang sumuko sa National Bureau of Investigation (NBI) ang kapwa akusado ni Sen. Leila De Lima sa kasong droga sa loob ng New Bilibid Prison si dating Bureau of Corrections (BuCor) Officer-in-Charge, Atty. Rafael Ragos.
Ayon kina NBI Deputy Directors Ferdinand Lavin at Atty. Sixto Burgos na nasa loob na ng NBI main headquarters si Ragos na ayaw magbigay ng anumang pahayag sa media.
Si Ragos ay sumuko at nakipagkita sa kanila kasama ang kaniyang abogado sa isang lugar sa Quezon City bago dinala sa NBI headquarters at isinailalim sa booking process kung saan siya kinunan ng mugshots at fingerprints.
Ngayong araw, dadalhin si Ragos sa sala ni Muntinlupa Regional Trial Court (RTC) Judge Juanita Guerrero ng Branch 204 para sa return of the warrant of arrest at isasabay na rin umano ni Ragos sa pamamagitan ng abogado ang pagsusumite ng mga pleadings at petisyon na sa NBI maidetine.
Nilinaw pa ni Burgos na ang ilang araw na hindi pagsuko ni Ragos ay dahilang naghanda pa umano ito ng mga papeles tulad ng pleadings na isusumite sa korte.
Ang korte ang magpapasiya kung saan dapat ikulong si Ragos.
Magugunita na una nang inaresto sina De Lima at ang kanyang dating driver-bodyguard-lover na si Ronnie Dayan na ikinulong sa Muntinlupa City Jail habang ang una ay sa Camp Crame Custodial Center.
- Latest