Lungon sa City Hall kalingawan ra

CEBU, Philippines - Giklaro ni Konsehal Joel Garganera nga walay malisya ang pagbutang nila og lungon atubangan sa iyang buhatan nga dunay news clippings mahitungod sa Inayawan landfill.

Niadtong adlaw’ng Huwebes naukay ang pipila ka empleyado sa Cebu City Hall human makita ang lungon nga matud pa dunay hulagway nila ni Mayor Tomas Osmeña ug asawa nga si Konsehal Margarita Osmeña.

Apan gitin-aw ni Garganera nga ang gibutang nila sa lungon ang front page sa newspaper mahitungod sa pagpasira sa landfill diin naa ang hulagway sa mga Osmeña ug ni Department of Environment and Natural Resources (DENR) Secretary Gina Lopez. Matud sa konsehal nga tungod kay halloween mao kini ang iyang theme apan wala ` siyay tumong aron tungluhon ang magtiayong opisyal tungod kay lingaw-lingaw ang ilang gusto.

Nihulagway sab kini nga ang naghatag og bati nga pagsabot sa ilang gihimo mao ang mga dumadapig sa pikas nga matud pa mga sipsip.

“Ila mang huna-huna maoy hugaw, and then you cannot help that, depende na lang ba if you can see a half filled glass they say it as half empty, unsaon man na mao man nay perspective, it’s a theme so mao nay nisantop sa ilang huna-huna wala na tay mahimo ana,” matud ni Garganera.

Apan si Konsehal Osmeña sa iyang bahin nakapangutana kung malipay ba ang mga bata sa pagbutang nila og lungon sanglit ang City Hall duna may giandam nga trick or treat alang sa mga bata.

Dugang sa konsehal nga kasabot siya nga si Garganera ug ang iyang mga empleyado mga environmentalists apan ang pangutana kung mobasa ba ang mga bata sa mga news clippings nga ilang gibutang mahitungod sa landfill.

Hinoon wala na hatagi pa og gibug-aton ni Konsehal Osmeña ang maong hitabo kay ang importante alang niya nga siya ug ang mayor dakung buhi, baskog ug piskay ang panglawas.

“Okey na lang, kung mao nay iyang idea of fun that’s his idea of fun, I’m alive and well, thank you and so is my husband with God’s grace we remain healthy and alive,” matud ni Konsehal Osmeña.

Ang Cebu City Hall dunay pakulo nga gihimo nunot niining nagkaduol nga kalag-kalag diin ang matag opisina sa mga konsehal dunay mga nagkalain-laing halloween designs.

Sama sa buhatan ni Konsehal Sisinio Andales diin dunay lungon nga gibutang sa gawas apan ang nakakuha sa atensiyon sa mga tawo ang suwat nga nagkanayon “nanugon ang libat adto ipalubong Concolacion”.

Ang mga empleyado sa maong buhatan nitataw nga wala sila nasayud kung kinsa ang nagsuwat niini. (BANAT NEWS)