NLEX mibira ni Lastimosa gikan sa Blackwater

CEBU, Philippines - Seryoso ang bag-ong coach sa NLEX Road Warriors nga si Yeng Guiao  nga mahimo dayong title contender sa PBA ang iyang koponan  pinaagi sa pagkuha ni Carlo Lastimosa, ang tirador sa Blackwater Elite.

Ang 26-anyos nga si Lastimosa mao ang numero unong scorer sa Blackwater diin mi-average siya og 18 puntos sa miaging season.

Si Lastimosa nabira sa NLEX gikan sa Blackwater bugti sa Fil-American nga si James Forrester ug usa ka second round pick sa sunod PBA draft.

Sa pagsulod ni Lastimosa, milig-on ang backcourt sa koponan tungod usab sa presensiya nila ni Kevin Alas, Emman Monfort, Garvo Lanete ug Jonas Villanueva.

Nakita usab ni Guiao nga mabaid pa niya si Lastimosa nga susama og estilo sa kanhi niya sinaligan sa Rain or Shine Elasto Painters nga si Jericho Cruz.

Ikauban usab ni Lastimosa sa NLEX ang iyang uyoan nga si PBA legend Jojo Lastimosa, kinsa sakop sa coaching staff ni Guiao. (BANAT NEWS)