Giputos og plastic

CEBU, Philippines -  Gipatay pinaagi sa pagtuok sa pisi, giputos og plastic tape ang lawas ayha gisulod sa usa ka plastic bag sa basura ang lawas sa usa ka lalaki nga gituohang biktima sa summary execution ug gilabay kilid sa dalan diha sa Brgy. Balud sa Lungsod sa San Fernando.

Hangtud sa pagkutlo niini nga balita wala pay tagtungod nga miila sa patay nga lawas nga naa karon sa Tupas Funeral Homes sa Dakbayan sa Carcar.

Matud pa ni Chief Inspector Richard Gadingan, hepe sa San Fernando Police nga nahinabi sa Banat News nga usa ka lalaki nga nakalabay sa maong dapit maoy unang nakabantay sa putos kilid sa dalan ug iyang nakita nga tawo ang sulod niini.

Sumala pa ni Gadingan nga dako ang posibilidad nga gipatay ang maong lalaki sa laing dapit ug didto lang kini gilabay.

Sigun pa ni Gadingan nga kung basihan ang porma sa gilabayan sa patay nga lawas posibling gikan sa South ang naglabay niini.

Gihulagway ni Gadingan nga anaa sa 40 hangtod 50 anyos ang pangidaron sa patay nga lawas, medyo taas og buhok ug anaa sa 5’4 ang gitas-on.

Sa pagkakaron dili pa makatug-an si Gadingan kung usa ba ka mahuyang ang gi-salvage kay nagsul-ob man kini og bra, nagsuot og itom nga leggings ug kolor green nga blouse nga gisuot sa taas.

Duna say bond paper nga nakita sa kapulisan nga anaay nakasulat nga “TULISAN KO” DUTERTE. Gipaslakan ang baba og daw sa gi-mummify ang lawas pinaagi sa pagputos og plastic tape.

Nagduda hinuon si Gadingan nga igo lang misakay sa uso sa panahon karon ang mihimo sa maong krimen ug dili sila motuo dayon nga tulisan ang biktima hangtud nga di kini mailhan ug makita ang record niini.

Basi sa pisikal nga kondisyon sa lawas sa maong lalaki dako ang pagtuo ni Gadingan nga posibleng mga alas 10 sa gabii pa gipatay ang maong lalaki.

Gipanawagan karon sa kapulisan kun kinsa nga pamilya ang nawad-an og sakop nga kaanggid sa paghulagway sa maong biktima  sa pagbisita lang sa ilang buhatan. (BANAT NEWS)