EDITORYAL - Tigmugna og kaguliyang
Naukay og maayo ang Sugbo tungod niining mga balita kabahin sa mga pagpangidnap og mga bata. Nakita karon kun unsa na kaalerto ang katawhan tungod sa aktibo nilang partisipasyon sa kahapsay ug kalinaw sa ilang palibot.
Niadtong Biyernes, adunay duha ka insidente nga na-report sa kapolisan sa lungsod sa Minglanilla ug sa Cordova. Alisto na kaayo ang mga tawo tungod usab sa ka moderno sa teknolohiya sa komunikasyon.
Kun dili man tanan, apan kadaghanan may access na sa internet, bisan lang sa ilang mga cellphones. Samtang duna kini matabang, apan usahay mas mopalabi ang mga sayop, mga bakak apan makadani sa mga tawo nga wa na’y panahon pagsusi kun unsa ka tinuod ang maong mga inpormasyon, ug resulta, maukay ang mga tawo.
Atol sa pagbuto sa alarma ug samtang naghimo pa og imbestigasyon ang kapolisan, daghang tiggamitan sa social media sama sa Facebook, twitter ug uban pa nga wa’y mga lingaw, na busy pud pagpakatap og mga bakak nga balita bahin sa hitabo aron ipasapasa sa ubang netizens.
Sa ilang gibuhat nagsabwag sila og mga bakak, makahadlok ug makadaot nga mga balita bisan og walay konpirmasyon gikan sa mga otoridad ang ilang gisabwag nga inpormasyon, basta lang adunay ma-post sa social media. Apan klaro kaayo nga ang uban kanila nagpakaaron-ingnon nga concern o ba kaha “updated” kunohay sa mga panghitabo sa palibot.
Lupig pa gud nila ang mga tinuod nga mediamen kay sila post lang, ug post nga wa’y kahadlok sa epekto sa ilang gibuhat nga usahay nakasala na sila sa mga hingtungdan sa ilang mga fake news. Apan subo kaayong palandungon nga ang mga lehitimong mediamen mao pa ang pasanginlan og “bias” nga unta mas may kredibilidad ug andam man sila nga manubag sa ilang gipangbalita.
- Latest