Cignal-San Beda lalapit sa semis vs JRU
MANILA, Philippines - Lalapit sa unang semis slot ang Cignal-San Beda sa pakikipagtipan sa Jose Rizal University ngayong hapon sa pagpapatuloy ng 2017 PBA D-League Aspirants' Cup sa Ynares Sports Arena sa Pasig City.
Nakasakay ang Hawkeyes sa six-game winning streak upang kapitan ang solong pamumuno na siyang naging daan upang makuha ang unang tiket sa quarterfinals.
Subalit hindi pa kuntento ang bataan ni Cignal coach Boyet Fernandez dahil target nitong makuha ang una sa dalawang awtomatikong tiket sa semis.
Ngunit mag-iingat ang Hawkeyes sa kanilang pagharap sa Heavy Bombers sa alas-5 ng hapon.
Ito ay matapos gulantangin ng Jose Rizal ang Racal noong Lunes sa pamamagitan ng 77-75 panalo sa likod ng impresibong laro nina Tey Teodoro at Paolo Pontejos.
Umangat sa 3-3 marka ang Jose Rizal subalit hindi rin titigil ang tropa ni coach Vergel Meneses upang maiwasan ang kumplikadong sitwasyon.
Magtutuos naman sa unang laro ang Wangs Basketball (2-5) at Blustar Detergent (0-6) sa alas-3.
- Latest
