Unsa’y relevance sa Miss Universe kanato?

Okay, dakong kadungganan sa atong nasud nga ang indigay sa kaanyag sa tibuok kalibutan, kon Miss Universe pageant, anhi ipahigayon sa atong nasud. Sa ato pa, ang mga mata sa tibuok kalibutan motutok sa atong nasud niining mga panahona.

Indeed, dakong garbo! Apan unsa may kinatibuk-ang epekto niini nganhi kanatong mga yanong lungsuranon diin ang kinabag-an kanato dili maka-afford pagtan-aw sa ilang mga legs panahon sa swimsuit competition?

Kapin kita sa 100 ka milyon nga molupyo ning nag-ilaid nga nasud, ug kapin sa 80 milyones niini, gigutom, sumala sa labing uwahi nga survey.

Karon, nagpatugatuga kita’g host sa Miss Universe pageant, diin pipila lang ka pudyot ang maka-enjoy niini. Yes, Virginia, unsa may relevance niini nganhi kanatong mga ordinary Pinoy in the streets?

Makahupay ba kini sa atong kagutom? Makapalingkawas ba kini sa atong kawad-on ug makatabang ba kini sa atong paningkamot karon pagpuo sa suliran sa druga ug kurapsiyon?

Usa kini ka dakong negosyo sa mga nagpasiugda, ug ang mga dagkong negosyante sa atong nasud mao ra ang makapahimulos, mabulahan ug malingaw ning maong kalihukan. Apan, ako ug ikaw, unsa man? What is it to us?

* * *

Disaster preparedness. Kasagaran nato nga mga Pinoy mao pay ilihok human maigo sa usa ka katalagman. Sa katigulangan pa, mao pay ipanguros tapus sa kilat. Unta manguros kita, mokilat man o dili, aron kun mokilat man, dili kita magdalidali og manguros.

Wala kanatong mga Pinoy ang pagpangandam. Mao pa ang atong i-inspection sa road worthiness sa mga bus nga depasahero tapus sa usa ka aksidente sa dalan. Mao pay atong idalidali pagpanglimpiyo sa atong mga sapa, human sa lunop.

Wala kanato ang disaster preparedness, maoy hinungdan nga ang Bayawan City sa Negros Oriental mao ang nakadawat sa labing taas nga award gikan sa gobiyerno, ang Presidential Lingkod Award, “for its exemplary and best practices in disaster preparedness.”

Round the clock ang pag-alagad sa ilang rescue group, dili kay panahon lang sa katalagman. May local flood early warning system sila, preemptive evacuation plan, geo-scientific map sa ilang siyudad, ug data center on disaster, weather monitoring and communication system.

Duna ba niini ang atong dakbayan, the queen city of the south?  So, makapangutana kita how disaster-prepared are we? Ang Bayawan City, usa ra ka gamay nga dakbayan kun itandi sa Cebu City apan may P42 milyones alang sa disaster fund, ug 70 porsiyento niini magamit panahon sa katalagman.

Kita dinhi sa ato, di ba gyud nato mahiklin ang politika?