800 mil nag penitential walk

CEBU, Philippines - Paghigugma sa kalikupan gipahimug-atan atol sa Santos nga Misa human sa Walk with Mary kagahapon sa sayong kaadlawon nga gitambongan sa kaliboan ka mga deboto.

Sa 13 minutos nga wali ni Fr. Manuel Tan ang Moderator sa Team of Pastor sa Our Lady of Guadalupe gihagit niya ang katawhan nga ampingan ang kalikopan.

Si Tan nikutlo sa unod sa mensahe sa Laudato Si sa encyclical letter ni Pope Francis ngadto sa ginsakopan niini nga nanawagan sa tanan aron amumahon ug mahalon ang kalikopan.

Sumala pa ni Tan kun abusohan sa tawo ang kinaiyahan nga gibuhat sa Labaw nga Makagagahom, ang tanang tawo mag-antos.

Duha ka mga dagkong kalamidad niadtong tuig 2013  nga 7.2-magnitude nga linog ug gisundan sa super typhoon Yolanda sa Kabisay-an gihulagway niya nga resulta pag-abusar ug pagpasagad sa tawo. Gibasol niini sa global warming o climate change apan matud pa niya adunay pari nga nagtuong ang maong kalamidad resulta sa kasagmuyo sa Magbubuhat ngadto sa tawo.

Matud pa ni Tan, kini tungod gipasagdan ug giabusahan ang mga butang nga hinimo sa kalibotan aron ipahuwam sa mga tawo.

Ang tema sa 452nd Fiesta Senyor, "Santo Nino: Source of communion, Protector of Creation."

800 mil deboto

Gibanabana ni Senior Police Officer 4 Graciano Tan, II sa Mobile Patrol Group base ngadto sa 800 mil ka tawo ang nitambong sa Walk with Mary kagahapon. Kagahapon usab ang unang higayon nga ang Mahal nga Birhen sa Guadalupe wala isakay og karosa gikan sa Archdiocesan Shrine of Our Lady of Guadalupe padulong sa Basilica Minore del Sto. Niño.

Matud pa ni Bro. Philip Gabutan, nga nahinabi sa Banat News, replica sa mahal nga birhen sa Guadalupe ang giapil sa Walk with Mary karong panahona, tungod kay gipreserbar nila ang original nga imahen.

Ang imahe nga giprosesyon hinimo ni Fr. Dodong Desuyo nga giingong gikopya gikan sa nawong sa Mahal nga Birhen apan mas gamay kini itandi sa orihinal nga imahen. Ang pagkarga niini sa tawo gihulagway nga usa ka penetensiya ug sakripisyo. (BANAT NEWS)