18 sikop sa nagkadaiyang buy-bust operation
CEBU, Philippines - Upat ka tawo nasikop sa managlahing buy-bust operation sa Brgy. Agus ug Basak sa dakbayan sa Lapu-Lapu niadtong Domingo.
Nasikop alas 5:45 sa buntag si Harry Soroño nga taga Sitio Ka-insong sa Brgy. Basak. Nakuhaan kini og 11 ka gagmay’ng pakete sa gituhoang shabu, matud ni PSIns. Alcon Escosura, hepe sa Marigondon Police Station.
Gidakop sab silang Ge-ar Nacorda ug Randy Bino, mga silingan ni Soroño human nasakpan nga nanuyop. Nakuhaan sila og tag duha ka gagmay’ng putos sa gituohang shabu.
Matud ni Escosura nga si Nacorda, usa ka drug surrenderer nga nitahan na niadtong buwan sa Hulyo niining tuiga.
Nadakpan sab si Michael Abarri sa Sitio Ibabao pagka alas 10 sa gabii. Laing onse ka gagmay’ng putos sa shabu ug P500 nga gituohang halin ang nakumpiska gikan kang Abarri, kinsa nalakip sa drug personality watch-list. Sa dakbayan sa Talisay, lima ka tawo ang nasikop gumikan sa kalambigitan sa ilegal nga drugas gikan sa managlahing barangay niadtong Domingo.
Unang operasyon nahimo alas 4:30 sa hapon sa Sitio Hawod, Brgy. Bulacao batok nilang Maria Victoria Ybañez alyas Marivic. Nakuhaan kini og upat ka gagmay’ng pakete sa shabu.
Nasikop sab silang Jeffer Dondon Delima taga Sitio Mansueto, Brgy. Bulacao kinsa nakuhaan og usa ka gamay’ng pakete sa shabu; Carmelo Cabriana alyas Tingting nga taga Sitio Ilang-Ilang, Brgy. Lagtang nga nakuhaan og marijuana ug usa ka babaye nga ginganlan og Janet.
Mga alas 8:30 sa gabii, girumbo sa mga otoridad ang Sitio Magay sa Brgy. Tangke ug ilang nadakpan si Janet Bazar Cimene nga nakuhaan og 14 ka gagmay’ng pakete sa shabu nga nagkantidad og P13, 200.
Sa lungsod sa Consolacion, walo ka tawo sab ang nasikop sa buy-bust operation nga gipangulohan ni PSInsp. William Homoc kagahapon sa kadlawon.
Unang operasyon nahitabo alas 3 sa kadlawon sa may Upper Lamac nga niresulta sa pagkasikop nilang Ryan Lacio, Joey Caparida ug usa ka menor de edad.
Nakuha gikan kang Lacio ang 6 ka putos nga shabu, samtang nakuha gikan sa menor de edad ang buy-bust money ug kang Caparida, nakuha ang usa ka 9 mm nga pistol. Pagka alas 3:30, girumbo na sab ang Sitio Lumbang, District 6 sa Brgy. Pulpogan diin nasikop si Jimboy Nainggue kinsa nakuhaan og 4 ka gagmay’ng pakete sa shabu ug usa ka snubnose 38 nga pistola. Nakasibat sab ang kauban niini nga si Toto Padilla.
Nadakpan sab silang Rolando Valiente, Billy Ocdenaria, Marvin Bucod ug Serge Inot nga nasakpang nanuyop sulod sa usa ka payag. (BANAT NEWS)
- Latest
