Away ng mag-utol sasambulat ngayon

MANILA, Philippines - Ang lahat ng koponang nakakalaban ng San Miguel ay pinoproblema kung paano pipigilin si ‘three-peat’ PBA Most Valuable Player awardee June Mar Fajardo.

Nagposte ang 6-foot-10 na si Fajardo ng mga averages na 19.3 points, 14 rebounds, 3.6 shotblocks at 1.3 assists sa kanilang best-of-five semifinals series ng sinibak na TNT Katropa.

Ayon kay Barangay Ginebra coach Tim Cone, wala pa siyang solidong estratehiya kung paano patatahimikin si Fajardo sa shaded lane.

“That’s going to be my job to formulate some ideas. I don’t even have a plan yet to stop June Mar. I’m not even sure if there is a plan to stop him. I don’t think even Phil Jackson will figure out how to stop June Mar,” sabi ng two-time PBA Grand Slam champion mentor sa Cebuano superstar.

Bubuksan ng Beermen at Gin Kings ang kanilang best-of-seven championship series para sa 2017 PBA Philippine Cup sa Game One ngayong alas-7 ng gabi sa MOA Arena sa Pasay City.

Pinatalsik ng San Mi­guel ang TNT Katropa, samantalang sinibak ng Ginebra ang Star sa kani-kanilang best-of-five semifinals showdown.

Inamin ni Fil-Puerto Rican guard Sol Mercado na malaking hamon para sa Ginebra ang makatapat ang San Miguel sa PBA Finals bagama’t sinibak na nila ang tropa ni coach Leo Austria sa semifinals series ng nakaraang 2016 PBA Governor’s Cup na kanilang pinagharian.

“They’re a huge task in front of us. We’re ta­king on obviously the best team in the league,” sabi ni Mercado. Hangad ng Beermen ang kanilang ikatlong sunod na All-Filipino Cup trophy na duduplika sa nagawa ng Tropang Texters para makamit ang Perpetual Trophy.

Matapos magkampeon sa 2016 PBA Philippine Cup kung saan nila niresbakan ang Alaska mula sa 0-3 pagkakabaon ay nabigo naman ang San Miguel na makapasok sa PBA Finals ng sumunod na Commissioner’s Cup at Governors’ Cup.

“We fell short of our goal in the last few conferences,” sabi ni San Miguel Fil-Am point guard Chris Ross, hinirang na Finals MVP ng nakaraang Philippine Cup.