EDITORYAL - Inom idili sa Sinulog

Kun piyesta gani kuno, anaa gyud ang inum-inom nga kabahin sa paghudyaka. Adunay miingon nga dili maayong idili ang pagpamaligya og mga ilimnong makahubog atol sa pagpahigayon sa Sinulog Grand Parade kay piyesta man kini ni Señor Santo Niño.

Si Konsehal Dave Tumulak, tsirman sa Committee on Peace and Order sa Cebu City Council, mosugyot og ordinansahon nga magdili sa pagpamaligya og ilimnong makahubog sa mga dapit duol sa rota nga agian sa Sinulog Grand Parade sa matag ikatulong Domingo sa Enero. Natan-aw ni Tumulak nga angay’ng did-an gyud ang pagpamaligya og ilimnong makahubog, ilabi na diha sa Ramos Extension, Juan Osmeña Street ug General Maxilom Avenue, kay anha gyud niining maong mga dapita nga daghang hubog atol sa pagpahigayon sa Sinulog Parade.

Ang kapolisan nga napakyas sa pagkontrolar sa daghang mga hubog kaniadtong miaging Domingo mipadayag na og suporta sa sugyot ni Tumulak. Sa pagmugna og ordinansa, hatagan gyud og higayon ang mga apektado sa pagpadayag sa ilang baruganan.

Tinuod, mura’g dili makiangayon alang sa mga tagdumala og tindahan nga naandan na nga namaligya og mga ilimnong makahubog, kun did-an sila sa pagnegosyo atol sa pagpahigayon sa Sinulog Parade. Higayon na unta nila kini nga makaginansiya og dako.

Apan angay’ng timbang-timbangon pag-ayo kun unsay palabihon, nga makaangkon og dakong ginansiya ang maong mga magpapatigayon apan makamugna og grabeng kagubot ang ilang mga kustomer?

Kun hatagan man gani og gibug-aton ang baruganan sa mga tag-iya og tindahan nga siguradong mosupak gyud niining tinguha ni Tumulak, angay nga hugtan usab pagpatuman ang balaod nga pangdakpon ang mga hubog nga magsuroy-suroy diha sa publikong lugar. Kinahanglang tinud-on usab ang pagsilot sa mga magpapatigayon nga wala motuman sa pasidaan sa mayor nga dili magbutang og dagkong sound boxes atubangan sa ilang balay patigayon kaniadtong Domingo nga nakadani sa pagpahigayon og street party.