Brgy Talisay, Santander, Cebu
“Guba na gyud kaayo ang karsada namo diri gikan Tulabugan padulong sa Inadlay kay wala na tagda sa among mga opisyal sa barangay ug lungsod. Lisud na agian, bisan sa mga motorsiklo.
Brgy Tinago, Cebu City
“Kining sapa sa Silangan-1 kay gisigehan man gihapon paglabay og mga basura, mura na man kini og “little dumpsite.” Naay konsehal namo sa barangay nga nagpuyo diri pero wala man makabadlong.
Brgy Basak, Mandaue City
“Gihangyo namo ang mga opisyal sa among barangay nga ibalik unta ang roving sa mga tanod matag gabii diri sa Sitio Mabolo ug Alliance kay daghan na kaayong mga batan-on nga mag-estambay ug ang uban kanila mga drug user.
Brgy Tejero, Cebu City
“Ingon kay gihingusgan na sab sa mga polis ang kampanya batok sa sugal? Nganong diri sa among barangay luyo sa Museo Sugbo, (Sitio Sampaguita, Valdueza ug Laurente) daghan man gihapon ang nag-operate og bingo machines?
Brgy Mactan, Lapu-Lapu City
“Sa Sitio Bato sa Soong kay ang basura dugay kaayong kuhaon, magtulo na ka buwan nga natanggong ang mga basura, pwerte na nga bahoa. Maayo pa sa ubang mga barangay kay kada adlaw kuhaon ang ilang mga basura.”
Brgy Mambaling, Cebu City
“Diri sa among lugar sa Abbya-Alaska kay wala may kanal, sige lang og ka pundo ang tubig ug kuyaw kaayo sa mga bata nga magka dengue kay daghan kaayong mga lamok. Sukad pa intawon kining among problema sa miaging tuig pero wala gyud tagda.”
Brgy Canjulao, Lapu-Lapu City
“Diri sa among barangay gitakda na usab nga magpa-tournament sa basketball aron kuno malingaw ang mga batan-on. Pero ang among pangutana, asa man ang premyo sa nahimong champion sa miaging tuig nga wala pa man mahatag?
Brgy Mangoto, Pinamungajan, Cebu
“Na unsa na man kining taytayan diri sa among barangay nga hangtod karon wala man humana pagtrabaho sa contractor, hapit na man mag-upat ka tuig. Hangyo namo sa mga opisyal sa lungsod nga tabangan kaming mapaayo na ang taytayan.”
Brgy Inayawan, Cebu City
“Dugay na kaayo kining among problema diri sa Sitio Lomboy, bahin sa mga adis-adis. Usahay kun walay kuwarta kay magtampohay sila basta makasuyop lang gyud kada adlaw.”
Brgy Linao, Talisay City
“Concern ko diri sa among lugar kay gikuha man ang traffic light nga gamit man unta kaayo kadto para sa seguridad sa mga tawo nga molabang sa karsada. Maayo unta nga ibalik kadto nila.
Brgy Balud, San Fernando, Cebu
“Diri sa Magtalisay kay grabeng pagdagsang sa ilegal nga drugas, naay daghang adik ug may namaligya sab og shabu diri. Wala man gyud ni mahatagi og aksyon nga unta duol ra man ang balay sa among kapitan diha nga dapita.
Alang sa inyong mga reklamo text lang sa 090326425494
- Latest
