Agaw eksena si Pogoy

MANILA, Philippines - Ipinarada ng TNT Ka-tropa ang bagong import na si Donte Greene ngunit inagaw ni Roger Pogoy ang eksena mula sa NBA veteran power forward.

Humugot si Pogoy ng 11 sa kanyang 24 points sa fourth quarter para tulu-ngan ang Tropang Texters sa 92-89 come-from-behind win laban sa Blackwater Elite sa 2017 PBA Commissioner’s Cup kagabi sa Smart Araneta Coliseum.

Bumangon ang TNT Katropa mula sa 10-point deficit sa third period para ilista ang kanilang ikalawang sunod na panalo kasabay ng pagpapalasap sa Blackwater ng pang-apat nitong dikit na kamalasan.

Tumapos si Greene na may 22 points kasunod ang 13, 11 at 10 markers nina Jayson Castro, Kelly Williams at Ranidel De Ocampo, ayon sa pagkakasunod, para sa Tropang Texters.

Itinayo ng Elite, nakahugot kay import Greg Smith ng 22 points at 31 rebounds, ang 10-point lead, 73-63 sa pagtatapos ng third quarter hanggang maiwanan sa 87-92 sa huling 1:15 minuto ng final canto.

Sa huling posesyon ng Blackwater ay naimintis ni Nino ‘KG’ Canaleta, nanggaling sa Globalport via trade ang kanyang tangka sa three-point line sa pagtunog ng final buzzer.

Samantala, gagawin ng Barangay Ginebra ang kanilang debut sa pagsagupa sa Phoenix ngayong alas-5 ng hapon sa University of Southeastern Philippines Gym sa Davao City.

Muling ipaparada ng Gin Kings si import Justin Brownlee, nag-akay sa kanila sa korona noong 2016 PBA Governor’s Cup laban sa Meralco Bolts.

“His size might be a bonus rather than a detriment, at least that’s what we hope, because he can play like a big guy, but he still has all the versatility of a little guy,” sabi ni two-time PBA Grand Slam champion coach Tim Cone sa 6-foot-5 na si Brownlee, ang pinakamaliit na import sa torneo.

Nagtala si Brownlee ng mga averages na 28.6 points, 11.3 boards, 3.8 assists at 1.7 steals sa 22 laro niya sa Ginebra bilang kapalit ni Paul Harris sa 2016 PBA Governor’s Cup.