Abu sa Sugbo negatibo

CEBU, Philippines - Negatibo sa presensiya sa bandidong grupo sa Abu Sayyaf ang Sugbo base sa pakisusi sa Police Regional Office-7.

Gitug-an ni Supt. Julian Entoma, hepe sa Regional Intelligence Division-7, nga human ilang nakuha ang impormasyon, nihimo dayon sila og pagsubay.

Matud ni Entoma nga nasuta sa intelligence report nga ang sub-commander sa grupo nga si Misaya ang tua ra sa Mindanao.

Si Entoma nagtuo nga ang nakita sa Sugbo susama lang og dagway sa sub-commander sa Abu Sayyaf o kaha igo lang kini niagi dinhi.

Gipasabot ni Entoma nga dili nila tuyo nga manghadlok sa pagpagawas sa nahaunang impormasyon hinungdan nga kini ilang gisubay.

Niangkon ang opisyal nga naalerto gyud sila sa maong impormasyon ug gani hangtud karon full alert pa gihapon ang kapolisan sa rehiyon.

Usa sa mga Muslim leaders sa Sugbo nga si Rashid Nalos nga nahinabi sa mga tigbalita nidason sa pamahayag sa kapolisan.

Si Nalos nibutyag nga base sa ilang pagsubay gikan sa ilang kaubanan, walay bisan usa ka sakop sa Abu Sayyaf nga naabot sa Sugbo.

Iyang gipasabot nga nihimo sab sila sa kaugalingon nga pakisusi sa taho.

Giangkon ni Nalos nga dunay mga bag-ong nawong nga ilang nakita apan kini pulos mga negosyante.

Si Entoma nanawagan sa publiko nga dili mokompiyansa ug kanunay magmabi-nantayon ug motug-an dayon sa kapolisan kung may mabantayan nga mga tawo nga kadudahan ang lihok.

Sama usab niini ang panawagan ni Talisay City Mayor Eduardo Gullas nga mo-report dayon sa kapolisan.

Ang Talisay usa sa mga lugar nga pwedeng madunggoan sa mga dautang elemento tungod sa kadali niini nga sudlon pinaagi sa kadagatan.

Matud ni Gullas nga dili isalig ang tanan ngadto sa kapolisan.

Labing nabalaka si Gullas tungod kay bag-o lang girelibuhan ang ilang hepe nga si Supt. Aileen Recla sa wala matino nga rason.

Siya nihangyo sa kadagkuan sa kapolisan nga paspasan nila ang pagbutang og hepe ang siyudad.

Si retired general Cecil Sandalo, peace and order consultant sa siyudad, ang gitahasan ni Gullas sa pag-superbisar sa kapolisan.

Si Sandalo nahimo sab kaniadto nga hepe sa kapolisan sa Dakbayan sa Talisay. (BANAT NEWS)