Nagpatay kang Nuñez nitahan

CEBU, Philippines -  Nitahan sa Guihulngan City Police Station sa Negros Oriental niadtong Huwebes ang suspek sa pagpatay sa hepe sa Catmon Police Station nga si Senior Insp. Alexander Nuñez.

Si Police Superintendent D’Artagnan Katalbas Jr., hepe sa kapolisan sa maong siyudad, niingon nga pasado alas 8 sa gabii nitahan sa ilang buhatan si Jaime Jayson, 22, nga taga Barangay Puente, Carmen.

Kuyog ni Jayson ang iyang bayaw nga maoy iyang gidangpan dihang naabot kini sa Calamba, Guihulngan City niadtong Disyembre 25.

Si Jaime giingong nakadungog sa balita nga wanted kini sa Sugbo hinungdan nga nahadlok ug nangayo og tabang sa usa ka konsehal sa barangay aron motahan.

Si Jaime gihatud sab dayon paingon sa Sugbo ug gi-turnover sa Provincial Intelligence Branch ug sa Carmen Police Station.

Gihimakak ni Jaime ang alegasyon ug niingon nga wala siya dihang gipusil sa iyang igsuon si Nuñez bisperas niadtong Pasko sa Puente, Carmen.

Si Jaime kauban ang iyang mga igsuon nga sila si Carlito, Ricardo, Camilo ug Carlo ang gitudlo nga maoy nagtinabangay nga mapatay si Nuñez human kini niresponde sa kagubot sa magsuon sa iyang paglabay sa lugar samtang padulong pauli aron magsaulog sa Pasko.

Apan si Camillo, Carlito ug Ricardo ang napatay ra sab sa kapolisan samtang si Carlo ang nabilanggo na.

Asoy pa ni Jaime nga niadtong higayuna nagsinukmagay sila sa nanghasi sa ilang pag-videoke nga si Lemuel Mondingo ug pipila ka metros ang gilay-on nakadungog siya og tulo ka boto.

Si Jaime nagkanayon nga patay na si Nuñez dihang iya nakit-an hinungdan sa iyang karatol dihang siya giingnan nga usa siya sa suspek sa pagpatay sa polis.

“Pwerteng kuyawa nako, mao to nga nidagan ko, Opon, Lapu-Lapu, unya nisakay ko para north bus, south terminal unya Tangil dayon Guihulngan,” matud ni Jaime.

Tumong sa iyang pagtahan mao ang paglimpiyo sa iyang pangan gikan sa mga pasangil.

Ang asawa ni Nuñez nga si Police Officer 3 Queen Brigitte Nuñez niingon nga namakak si Jaime sa iyang pamahayag.

Hinoon kini nagpasalamat nga anaa na sa kamot sa kapolisan ang suspek aron manubag sa krimen nga nahimo.

Samtang gikalipay sa kapolisan sa Lungsod sa Catmon ang pagtahan ni Jaime.

"Nalipay gyud mi kay para namo ang pagtahan niini magmalinawon na man ang kalag ni sir," matud ni Senior Police Officer 2 Cresente Armamento sa Catmon Police Station.

Si Nuñez gilubong niadtong Enero 6 sa Sanctuary Memorial Park sa Dakbayan sa Danao. Jojo C. Ugdol, Le Phyllis F. Antojado ug Romeo T. Limpangog (BANAT NEWS)