Hinabang sa mga nasunugan himoong P20 million

CEBU, Philippines - Nakadawat na og hinabang pinansiyal gikan sa kagamhanan sa dakbayan sa Sugbo ang mga nasunogan gikan sa tulo ka barangay sa siyudad sa Sugbo nga nagkantidad og P10 mil.

Sa gihimong pagpang-apod-apod kagahapon, makita sa panagway sa mga biktima sa sunog sa barangay Lorega, Capitol Site ug Suba ang kalipay atol sa ilang pagdawat sa P10 mil nga financial assistance. Gihulagway sa mga beneficiaries nga makatabang gyud ang maong kantidad sa pagpatukod nila og balik  sa ilang mga panimay. Hinuon ilang giangkon nga kuwangon ang kantidad sa pagpalit og mga materyales.

Nasayran nga nalangay ang pagpanghatag sa financial assistance ilabi na ngadto sa mga nasunugan sa Lorega ug Capitol Site.

Matud ni Lea Japson, pangulo sa City Social Welfare and Services (CSWS) nga adunay kakulian sa proseso diin ilang gisunod ang payroll type kaniadto apan dili diay kini mao sumala sa Commission on Audit (COA) kay kinahanglan tagsa ka voucher ug tseke ang matag claimant hinungdan nga ilaha kining giusab base sa COA.

Ang nakadawat sa hinabang gikan sa Capitol Site niabot og kapin usa ka gatos ka indibidwal, 42 sa Lorega ug 15 lang sa Suba.

Sa pag-claim nila sa hinabang, gipakita sa mga beneficiaries ang authenticated ID ug ang intake gikan sa social worker sa CSWS.

Sa maong tigum, gipahibawo ni Cebu City Mayor Tomas Osmeña nga nagtinguha siya karon nga doblehon ang financial assistance sa mga masunugan diin gikan sa P10 mil, himoon kini niyang P20 mil.

Dugang sa mayor nga ang mga empleyado gani sa City Hall nakadawat og P20 mil nga assistance dihang niigo ang bagyong Yolanda, ang mga fire victims na ba kaha nga walay kapuy-an.

Gitahasan ni Mayor Osmeña sa maong plano mao si Defacto City Administrator Bimbo Fernandez diin matud niini tan-awon nila kun mahimo ba nga mopagawas og Executive Order ang mayor aron matuman ang maong tinguha. (BANAT NEWS)