Jailbreak: 5 preso pumuga

ISULAN, Sultan Kudarat – Limang preso mula sa provincial jail ang iniulat na nagpasabog pa ng granada saka pumuga kamakalawa ng hapon sa nabanggit na lalawigan.

Ang mga pumugang preso na may mga kasong carnapping at illegal possesion of firearms ay nakilalang sina Jinaid Duat, Edwin Sapalon, Jainodin Sultan, Abdul Torres at Halatodin Biah Acob na pawang residente ng Maguindanao.

Namimiligro namang masibak sa puwesto si Provincial Jail Warden Rolly Ampuyas dahil sa naganap na pangyayari bandang alas-2:30 ng hapon makaraang masalisihan ang mga guwardiya dahil sa dumagsang bisita.

Ayon sa ulat, nagpulasan ang mga guwardiya at bisita ng ibang preso nang magpasabog ng granada ang mga pumugang preso, kasabay naman ang biglaang inspection sa mga selda na nagresulta sa pagkakadiskubre ng mga itinatagong sumpak, baril at mga patalim. (Ulat ni Teng Garcia)