Nagpasiugda’g swertres, sikop

CEBU, Philippines - Gidakop sa mga sakop sa Danao City Police Station ang usa ka tawo nga ilang naaktohang nagpasiugda og ilegal nga swertres sa Danao Public Market sa may Barangay Poblacion, alas 2 pasado kagahapon sa hapon.

Giila ni PO3 Joel Illustrisimo ang nadakpan nga si Selvestre Lungakit kinsa nakit-an sa nagpatrolyang kapolisan nga gitapuk-an sa mga tawo nga mipatad og illegal swertres.

Giingong nag-iyahay og panagan ang mga tawo dihang nakakita sa mga polis samtang ang suspetsado nalingaw sa pagsuwat og numero hinungdan nga nasikop. Nakuhang ebidensiya gikan niini mao ang illegal swertres paraphernalia ug salapi nga mokabat sa P2,200 nga gituohang halin niini. (BANAT NEWS)