Record sa Cavs
CEBU, Philippines - Ang Cleveland Cavaliers mikulit og NBA regular-season record nga 25 ka tres sa 135-130 nilang kadaugan batok sa Atlanta Hawks kagahapon didto sa Philips Arena sa Atlanta, Georgia.
Ang kanhi batos sa Hawks nga si Kyle Korver maoy milansang sa 3-pointer nga nakamugna og record sa nahabiling 1:17 sa duwa. Mao sab kini ang nakapabugnaw sa mainit nga rally sa Atlanta.
Mikolapso ang Cavs human nakalabaw og 25 puntos sa second half hinungdan nga nakasikit ang Hawks ngadto na lang sa uno punto sa oras nga 1:32 sa katapusang kuwarter, apan si Korver mabayanihong misalbar sa defending champion.
Emosyonal kaayo ang maong duwa ni Korver diin siya gihatagan og standing ovation sa Hawks fans atol sa iyang pagsud sa naghinapos nga bahin sa unang kuwarter. Si Korver gi-trade sa Hawks niadto lamang Enero.
Bisan tuod og mihimo’g impresiyon si Korver, sila si Kyrie Irving ug LeBron James maoy nangu sa Cavs.
Si Irving mibirada og 43 puntos, apil na ang walo ka tres, samtang si James miigo og unom ka tres sa iyang 38 puntos uban ang 13 ka rebounds ug walo ka assists.
Sa kinatibuk-an, ang Cavs mipasud og 25 sa 46 ka tres nga ilang gibuhian aron pagpapas sa karaang rekord sa Houston Rockets nga mihimo og 24 ka tres sa 112-100 niining daog batok sa New Orleans Pelicans niadtong Disyembre 16.
Nangu sa Hawks mao si Tim Hardaway Jr. nga mipatuasik og career-high 36 puntos. Si Paul Millsap midugang og 27 puntos ug 10 ka rebounds, samtang si Dwight Howard mipupo og 15 puntos ug 10 ka rebounds, apan pareho silang naminghoy kay napakyas atubangan sa bagang duot sa ilang mga dumadapig.
Sa lain pang mga resulta, ang Philadelphia Sixers nakaipsot sa New York Knicks, 105-103, ang Toronto Raptors mipukan sa Washington Wizards, 114-106, ang Orlando Magic mipabugnaw sa Miami Heat, 110-99, ang Milwaukee Bucks mipilde sa L.A. Clippers, 112-101.
Ang Dallas Mavericks midaog batok sa Memphis Grizzlies, 104-100, ang Utah Jazz milubong sa Brooklyn Nets, 112-97, gipakaging sa Phoenix Suns ang Oklahoma City Thunder, 118-111, ang San Antonio Spurs mipaluhod sa New Orleans Hornets, 101-98 ug gilubong sa Boston Celtics ang L.A. Lakers, 115-95. (BANAT NEWS)
- Latest
