TNT katropa pinataob ang Mahindra

MANILA, Philippines - Kasabay ng pagpigil sa kanilang dalawang sunod na kamalasan ay tinapos naman ng Tropang Texters ang two-game winning run ng Floodbusters.

Kumalawit si Troy Rosario ng 18 points at 9 rebounds, habang lima pa ang umiskor sa double figures para tulungan ang TNT Katropa sa 104-92 paggiba sa Mahindra at palakasin ang kanilang pag-asa sa quarterfinal round ng 2017 PBA Philippine Cup kagabi sa Cuneta Astrodome sa Pasay City.

Nagdagdag si rookie guard Roger Pogoy ng 16 markers, habang may 14 si Moala Tautuaa, tig-11 sina Kris Rosales at Larry Fonacier at 10 si Jayson Castro para sa 5-4 baraha ng Tropang Texters.

“Not so much satisfied if we base it on this game,” sabi ni coach Nash Racela sa inilaro ng kanyang TNT Katropa. “But the players are finding a way to deliver. It is a positive outcome for us.”

Kinuha ng Mahindra, nalaglag sa 2-6 marka kasosyo ang NLEX, ang first half bitbit ang 57-51 abante sa likod ng 12 points, 4 rebounds at 3 assists ni Allex Mallari.

Humataw naman ang Tropang Texters sa third period para iwanan ang Floodbusters sa 78-71 mula sa basket ni Fonacier sa 2:28 minuto patungo sa 82-78 bentahe sa pagtatapos ng nasabing yugto.

Sa fourth quarter ay itinayo ng TNT Katropa ang 10-point lead, 100-90, laban sa Mahindra mula sa nakapuslit na layup ni Jason Castro sa huling 3:59 minuto nito.

“I’m really hoping we’re headed in the right direction. It takes a lot of sacrifice,” wika pa ni Racela.

Pinangunahan naman ni Mallari ang Floodbusters sa kanyang 19 points kasunod ang tig-10 markers nina Philip Paniamogan at Mark Yee.

TNT Katropa 104 - Rosario 18, Pogoy 16, Tautuaa 14, Rosales 11, Fonacier 11, Castro 10, Reyes 7, Rosser 7, De Ocampo 7, Golla 2, Carey 1, Williams 0.

Mahindra 92 - Mallari 19, Paniamogan 10, Yee 10, Revilla 8, Deutchman 7, Celda 7, Escoto 6, Salva 6, Arana 6, Galanza 5, Ballesteros 3, Elorde 3, Eriobu 2, Digregorio 0,

Quarterscores: 29-25; 51-57; 82-78; 104-92.