Anomalya sa GSIS, giit aksiyunan ng Malacañang
MANILA, Philippines - Balot ngayon ng matinding pangamba ang mga guro at empleyado na baka tuluyan ng mabaon sa limot ng Palasyo ng Malakanyang ang iba’t ibang umano’y anomalya sa Government Service Insurance System (GSIS) na ang mga biktima’y mayorya ng higit anim na raang pampublikong guro at empleyado sa buong kapuluan.
Sinabi ni Alliance of Volunteer Educators Partylist (AVE) Executive Director at Spokesperson Arnulfo Empleo na siya ring Presidente ng National Association of Public Secondary School Heads Inc (NAPSSHI) na sa nalalabing araw sa kapangyarihan ng kasalukuyang administrasyon, dapat aniya nitong pakialaman na ang problema ng mga guro patungkol sa kanilang mga benepisyo na hindi naibibigay ng GSIS dahil sa talamak na byurukrasya, mabagal na sistema, walang kakayahang mamahala ng liderato nito at iba’t ibang anomalya.
Inihayag ni Empleo na bumilang na ng maraming taon ang sinasabing iregularidad sa GSIS ngunit nananatiling bigo ang ahensiya na masugpo ang katiwalian dito sa ilalim ng liderato ni Winston Garcia.
“Ano bang impluwensiya mayroon si Ginoong Winston Garcia para manatili siya sa puwesto gayung lantad naman sa mga miyembro ng GSIS kung paano niya pinatakbo ang ahensiya? Iyung mga benepisyo na inaasahan ng mga miyembro sa kanilang pagreretiro, bakit hindi maibigay?” ayon pa sa AVE Partylist spokesperson.
Ilan sa mga tinukoy ni Empleo na sinasabing iregularidad sa GSIS ay ang hindi maipaliwanag na katakut -takot na pagkaltas sa buwanang sahod ng mga guro, hindi pag-aa pruba sa loan application ng mga miyembro dahil umano sa unpaid debt at iba pa.
“Kung sisiyasatin ang record mismo ng remittances na isinumite ng employer, marami sa amin na wala ng outstanding balance kaya nakapagtataka kung bakit hindi makautang ang marami sa amin.
Lumalabas na late posting ang nangyayari na kapabayaan ng mga taga- GSIS at itoy isang malinaw na repleksyon sa liderato ng naturang ahensiya ng pamahalaan,” wika ni Empleo.
Binigyang diin pa nito na hindi dapat ipagwalang-bahala ang problema ng mga kawawang guro at empleyado na sa kakaunting benepisyong magagamit sa pagreretiro ay naipagkakait pa. (Mer Layson)
- Latest
- Trending