Atong Ang inalok umano si PCSO chief Balutan ng P200M kada buwan na suhol

MANILA, Philippines — Upang makuha ang pamamahala sa pagpapalakad ng Small Town Lottery sa buong bansa, inalok umano ng negosyanteng si Atong Ang ng P200 milyong suhol kada buwan si Philippine Charity Sweepstakes Office (PCSO) general manager Alexander Balutan.

Ito ang isiniwalat ni Balutan kahapon sa pagdinig ng House committee on games and amusement.

Tinanong si Balutan kung sino ang umano’y nagtangkang mangsuhol sa kaniya at sinabi ng PCSO chief na: “It’s Mr. Atong Ang, your honor.”

Sinabi ni Balutan na sinamahan ng ngayo’y PCSO board member Sandra Cam si Ang nang alukin siya ng suhol.

Aniya mapatutunayan niya ito sa kuha ng mga closed circuit television cameras.

Dagdag ng retiradong Marine major general na sinabi umano sa kaniya nina Cam at Ang na ipinadala sila ni Pangulong Rodrigo Duterte.

Kaagad naman itong binaggit ni Balutan kay Duterte.

“He told me: don’t bend your rules. Just follow your rules. Just follow your rules, even if it involves my own son,” sabi umano ni Duterte kay Balutan

Pinabulaanan naman ni Cam ang mga paratang ni Balutan.

“He’s lying through his teeth. Atong Ang and President Duterte are friends. The P200 million Atong was talking about was the total amount of STL revenues on a daily basis,” sabi ni Cam.

Ayon pa sa PCSO board member ay si Special Assistant to the President Bong Go ang nagpapunta sa kanila.

Bago lumipad patungong India ay inamin ni Duterte na humingi siya ng tulong kay Ang upang maayos ang PCSO.