Binata kisay sa pangangarit ng niyog
MANILA, Philippines - Hindi na umabot nang buhay sa pagamutan ang isang 38-anyos na binata makaraan itong aksidenteng makuryente habang nangangarit ng niyog sa Brgy. Sumalig, Tambulig, Zamboanga del Sur kamakalawa ng hapon.
Kinilala ang nasawing biktima na si Victor Manago Calgas, 38-anyos, residente ng Brgy. Digson, Bonifacio, Misamis Occidental.
Sa ulat ng Police Regional Office (PRO) 9, nangyari ang insidente sa nasabing lugar bandang ala-1:00 ng hapon.
Ayon sa imbestigasyon, kasalukuyang nangangarit ng niyog ang biktima sa niyugan na pag-aari ni Ferdinand Macquling sa Brgy. Sumalig nang aksidenteng maputol ang service drop ng live wire sa poste ng kuryente nang tamaan ng bumagsak na bunga ng niyog.
Agad na pinulot ng biktima ang nalaglag na bunga ng niyog na tumama sa live wire bunsod upang magkikisay ito bunga ng dumaloy na malakas na boltahe ng kuryente sa kaniyang katawan.
Nagulantang na lamang ang kaniyang mga kasamahang kapwa mangangarit ng niyog sa biglaang pagbagsak ng biktima .
Naisugod pa sa Tambulig Municipal Health Center ang biktima pero idineklara na itong dead on arrival.
- Latest
