Open Access Bill tinalakay na sa Senado
MANILA, Philippines — Tinalakay na kahapon sa Senado ang Open Access Bill na naglalayong mabuksan sa ibang players o internet providers ang merkado sa Pilipinas.
Ayon kay Senator Bam Aquino pasado ang panukala sa House of Representatives kaya hinahabol na rin ito sa Senado.
Naniniwala si Aquino na mahalagang mabuksan sa ibang players ang data transmission upang magkaroon ng kompetisyon.
“Ang ibig po sabihin ng Open Access, binubukas natin yung merkado ng Data Provision or Data Transmission sa ating bansa. Nakikita natin na mataas yung presyo ng data sa Pilipinas, at mabagal po at hindi maganda yung kalidad dahil kakaunti lang yung market players nito. Kapag naituloy natin yung Open Access, maibubukas po natin ‘yung buong merkado,” sabi ni Aquino.
Ipinaliwanag pa ni Aquino na magkakaiba ang segment ng merkado dahil may mga kumukuha ng internet mula sa mga submarine cables at dapat mabigyan ng pagkakataon ang ibang players na makapasok sa bansa.
Ani pa ni Aquino, kahit pa aniya mula sa China o sa ibang bansa manggaling ang mga players, ang malahaga ay mapabilis ang internet sa bansa at mas magmura ang presyo nito.
Naniniwala rin ang senador na dapat mas maging madali ang pagpasok ng mga players dahil sa ngayon ay kinakailangan pa ng congressional franchise at iba’t ibang permits.
- Latest
