5 SC justices tetestigo rin laban kay Sereno

MANILA, Philippines — Lima pang hukom ng Korte Suprema ang handang tumestigo sa impeachment proceedings ni Chief Justice Maria Lourdes Sereno sa Kamara.

Ayon sa ulat ng STAR, inimbitahan ng House justice committee sina Associate Justices Diosdado Peralta, Lucas Bersamin, Mariano del Castillo, Samuel Martires at Andres Reyes Jr. na dumalo sa pagdinig sa Enero 2018.

Kung dadalo silang lima ay aabot na sa siyam na hukom ang sasalang sa witness stand, mas marami pa sa majority ng mataas na hukuman na walo.

Una nang nagsalita sina Associate Justices Teresita Leonardo-de Castro, Francis Jardeleza, Noel Tijam at retired Associate Justice Arturo Brion.

Inimbitahan na rin ng komite si Senior Associate Justice Antonio Carpio.

Nitong Nobyembre 28 ay pinayagan ng Korte Suprema na dumalo sa pagdinig ng Kamara ang mga hukom at maging ang mga kawani ng opisina.