Sereno ipapatawag muli ng Kamara
Sa halip na i-subpoena, muli na lamang ipapatawag ng House Justice Committee si Supreme Court (SC) Chief Justice Maria Lourdes Sereno para humarap sa impeachment hearing sa susunod na linggo sa Kamara. CSIS/CC BY-NC-SA
MANILA, Philippines — Sa halip na i-subpoena, muli na lamang ipapatawag ng House Justice Committee si Supreme Court (SC) Chief Justice Maria Lourdes Sereno para humarap sa impeachment hearing sa susunod na linggo sa Kamara.
Sinabi ni Atty. Rene Delorino, committee secretary, na imbitasyon lamang at hindi pa subpoena ang ipinadala nila kahapon kay Sereno at sa 11 pang inbidwal.
Bukod kay Sereno, kasama rin sa listahan ng mga pahaharapin sa Lunes bilang resource persons sina SC Associate Justice Teresita de Castro, SC administrator Midas Marquez, SC spokesman Atty. Theodore Te, SC Clerk of Court Felipa Anama, Associate Justice Noel tijam, Justice Secretary Vitaliano Aguirre at ang reporter ng Manila Times na si Jomar Canlas.
Si Canlas ang itinuturo ni Atty. Larry Gadon na siyang umano’y nagbigay ng impormasyon sa pagbabago ni Sereno sa draft TRO ni de Castro kaugnay sa usapin ng Senior Citizens partylist.
Samantala, iisyuhan naman ng subpoena Duces Tecum si UP President Danilo Concepcion para isumite ang kopya ng SALN ni Sereno noong nasa UP pa siya, gayundin si BIR Commissioner Cesar Dulay para isumite naman ang tax records ni Sereno na magpapatunay kung nagbayad ang punong mahistrado ng buwis sa kinitang milyones sa PIATCO case.
Kaugnay nito, nagpahiwatig naman si Umali na gagana ang numero ng super majority ng mga kongresista sa magiging hatol ng kapulungan kung dapat i-impeach ang punong mahistrado.
Tahasang sinabi rin ng kongresista na malas lang ni Sereno na may super majority sa Kamara dahil magiging mabigat umano para sa punong mahistrado na banggain ang super majority sa punto ng botohan sa plenaryo.
- Latest
