Kung ‘di ko kaya illegal drugs magre-resign ako! – Digong

MANILA, Philippines — Siniguro kahapon ni Pangulong Duterte na nakahanda siyang magbitiw sa puwesto kapag nabigo siyang makontrol ang problema sa illegal drugs sa bansa.

“If I cannot control drugs, it is time for me to think about my resignation,” pahayag ng Pangulo sa kanyang mensahe sa 67th Anniversary of the First Scout Ranger Regiment sa Camp Tecson, San Miguel, Bulacan.

Inulit din ni Pangulong Duterte na plano na niyang ibalik sa Philippine National Police (PNP) ang operasyon ng anti-drug campaign.

“I am inclined to call back the PNP into the Philippine drug war. I have not signed the executive order but I’m inclined to call up the police and join the drug war,” wika niya.

Magugunita na pinagbawalan niya ang PNP at iba pang law enforcement agencies na magsagawa ng anti-drug campaign at inatasan ang Philippine Drug Enforcement Agency (PDEA) na tanging ahensiya na mamumuno sa anti-drug war.

Pero kamakalawa ay sinabi ni Presidential Spokesman Harry Roque na hindi umano kuntento si Pangulong Duterte sa na­ging performance ng PDEA kaya planong ibalik na ang drug war sa PNP.

Samantala, sinabi din ng Pangulo na kaya niya nilagdaan ang Proclamation no. 360 na nagkakansela sa peace talks sa CPP-NPA-NDF ay dahil kagustuhan ng communist group na magtayo ng coalition government.

“I have released about 30, 40 communist leaders from Muntinlupa. Now I will consider the movement of CPP as a terrorist group, and I am ordering those I have released to surrender or face punitive action. Go back to where you belong,” giit pa ni Pangulong Duterte.

Iginiit din ni Pangulong Duterte sa mga sundalo ang strong military at police sa ilalim ng kanyang administrasyon.

Aniya, mga modernong kagamitan na puro bago ang kanyang binili para magamit ng mga sundalo at pulis sa pakikipaglaban sa mga kaaway ng gobyerno.

“Do not be afraid to die. All of us will die anyhow,” sabi pa ni Pangulong Duterte sa mga miyembro ng Scout Rangers.