Trudeau binanatan ng mga senador

MANILA, Philippines — Binanatan kahapon ng ilang senador si Canadian Prime Minister Justin Trudeau dahil sa pagbanggit ng isyu tungkol sa extrajudicial killings (EJKs) noong nakausap si Pangulong Duterte.

Ayon kay Majority Leader Vicente “Tito” Sotto III,  hindi dapat nakikialam si Trudeau sa isyu ng bansa at dapat ang asikasuhin nito ay ang basura ng Canada na ipinadala sa Pilipinas.

“Ba’t siya makikia­lam, pakialaman niya yung basura niya,” sabi ni Sotto.

Naniniwala si Sotto na diversionary tactic o pang­lilihis sa isyu ang ginawa ni Trudeau upang hindi mapag-usapan ang basurang itinapon sa bansa.

“I find it to be to be a diversionary tactic. Pag usapan mo yung debatable at controversial sa isang bansa, para hindi mapag usapan yung kontrobersya sa yo. Kaya imbes na mapag-usapan yung toxic waste or basura ng Canada na idinump sa atin, dinala nya yung usapan dun sa EJK na hindi pinag-uusapan ng superpowers like the US, China and even the EU because they feel that it’s a local problem,” dagdag ni Sotto.

Naniniwala naman si Sen. Gregorio Honasan na “unusual” ang ginawang pagbanggit ni Trudeau sa isyu ng EJK.

Sinabi rin ni Honasan na nangyayari rin maging sa ibang bansa katulad ng Amerika ang maraming patayan.

“Ano ba definition nyo sa EJK? Nakita nyo ba yung nangyari sa US? Ano tawag natin doon na papatay ka ng ganung karami sa Las Vegas? Let’s just be fair. And even diplomatically let’s give each other some measure of mutual respect. Let’s not be too judgmental because if we consider killings outside the rule of law, yung inutos? Then we do not have a monopoly of that. Other countries have done worse. In fact other countries invented EJKs. Let’s not be too harsh on ourselves,” sabi pa ni Honasan.

Katulad ni Sotto kinuwestiyon din ni Honasan kung ano ang plano ng Canada sa basurang itinapon sa Pilipinas.