Mega drug rehab gawin na lang drug academy - Sotto
MANILA, Philippines — Sa gitna ng isyu tungkol sa Mega Drug Abuse Treatment and Rehabilitation Center sa Fort Magsaysay, Nueva Ecija na hindi naman umano masyadong nagagamit, iginiit ni Senate Majority Leader Tito Sotto na maari rin itong gawing mega drug enforcement academy.
Naniniwala si Sotto na hindi naman sayang ang pagpapatayo ng pasilidad at maari pa rin itong mapakinabangan.
Maari aniyang gawin ng Philippine Drug Enforcement Academy (PDEA) na extension ng kasalukuyang PDEA Academy ang nasabing pasilidad.
Sa laki aniya ng center sa Nueva Ecija, libo-libong agents ang maaring makapagtapos sa nasabing center na maaari ring magamit ng Bureau of Customs, Immigration, Philippine National Police at maging ng National Bureau of Investigation.
Puwede rin aniyang gawin na katulad ng International Law Enforcement Academy sa Bangkok ang nasabing pasilidad.
“It can be like the ILEA (international law enforcement academy) in Bangkok. The President may also seek assistance of guest instructors from China’s police academy, US FBI, Australian police academy and others to make it a world class training facility,” sabi ni Sotto.
Ang nasabing pasilidad ay itinayo sa 75,000 ektarya kung saan ang mga materyales ay donasyon ng Chinese philanthropist na si Huang Rulun.
- Latest
