Phl sa Vietnam: Probe sa 2 Vietnamese killing, magiging patas
MANILA, Philippines — Tiniyak kahapon ng pamahalaan sa Vietnam na magkakaroon ng patas na imbestigasyon sa pagkamatay ng dalawang mangingisdang Vietnamese na naaktuhan ng Philippine Navy na illegal na nangingisda sa karagatang sakop ng Pangasinan.
Personal na nakausap ni Foreign Affairs Secretary Alan Peter Cayetano ang opisyal ng Vietnam sa ginanap na ika-72 sesyon ng United Nations General Assembly at siniguro na magiging patas ang imbestigasyon sa insidente.
Sinabi ni Presidential Spokesman Ernesto Abella na nakikipag-ugnayan na ang Department of Foreign Affairs (DFA) sa Vietnam Embassy sa Manila kaugnay sa insidente.
Ayon naman kay Col. Edgard Arevalo, Chief ng AFP Public Affairs Office, sinimulan na ng Armed Forces of the Philippines (AFP), Philippine National Police (PNP) at Philippine Coast Guard (PCG) ang pagsisiyasat sa pagkamatay ng dalawang Vietnamese na kasama sa pitong mangingisdang Vietnamese na tinugis ng Navy men kamakalawa matapos na maaktuhang illegal na nangingisda sa Cape Bolinao, Pangasinan.
Nagkaroon umano ng habulan sa pagitan ng Patrol Ship 19 ng Naval Forces Northern Luzon ng Navy at ng Vietnamese fishing dahilan upang mag-warning shot ang mga Navy personnel. Binangga umano ng Vietnamese fishing vessel ang Patrol Ship 19 at nang magsagawa ng visit, board, search and seizure (VBSS) sa barko ang Navy personnel ay natagpuan sa loob nito ang bangkay ng dalawang Vietnamese.
Ayon kay PNP Spokesman Chief Supt. Dionardo Carlos, base sa ulat ni Pangasinan Provincial Police Office PPO) Director P/Sr. Supt. Ronald Oliver Lee, ang dalawang nasawing Vietnamese ay sina Le Van Liem, 41 anyos at Le Van Reo, 41 anyos; pawang nagtamo ng tama ng bala sa katawan habang anim na tama ng bala ang nakita sa barko.
- Latest