Andanar: Mocha hindi na sasama sa mga casino show ng ‘Mocha Girls’

MANILA, Philippines – Hindi na sasama sa mga show ng “Mocha Girls” sa mga casino si Communications Assistant Secretary Margaux "Mocha" Uson matapos siyang ulanin ng batikos.

Tiniyak ito ng kaniyang boss na si Communications Secretary Martin Andanar ngayong Biyernes.

BASAHIN: PCOO iimbestigahan ang show ni Mocha sa casino

Nakita si Uson na nag-show sa Bar 360 ng Resorts World Manila nitong Martes sa kabila ng Presidential Order na nagbabawal sa mga kawani ng gobyerno na pumasok sa mga casino.

“In view of its negative effect on the public perception of government service as a whole, the mere entry or presence of government officials and employees in a gambling casino shall be considered as conduct prejudicial to the best interest of the service, unless the same was in the performance of official duties and functions,” nakasaad sa kautusan na inilabas noong Setyembre 2016.

Sa naunang panayam ay sinabi ni Andanar na bago pa man makapasok sa kaniyang opisina si Uson ay ipinaalam na nito ang mga nakakontrata nang shows.

Nakasaad sa website ng casino na tuwing Martes ang show ng grupo na pinangungunahan ni Uson.

Sinabi ni Andanar na tinitingnan na ng Office of the Executive Secretary ang kaso ni Uson.