Sa banta ng BIFF na next target siya Digong: ‘Di ako takot!
MANILA, Philippines - Hindi ikinababahala ng Malacañang maski ng Armed Forces of the Philippines (AFP) ang direktang banta ng Bangsamoro Islamic Freedom Fighters (BIFF) laban kay Pangulong Duterte.
Magugunitang inihayag ng BIFF na matapos ang pag-atake sa Pigcawayan, North Cotabato, sunod nilang target ay mismong si Pangulong Duterte na.
Sinabi ni Gen. Gilbert Gapay, deputy commander ng Eastern Mindanao Command, ang bantang ito ng BIFF ay maituturing lamang na ‘desperate pronouncement’ o desperadong pahayag.
Ayon kay Gen. Gapay, ang ginawang pag-atake ng BIFF sa Pigcawayan ay diversionary o retaliatory attack matapos ang natamong major setback sa kanilang ‘stronghold’ sa Maguindanao.
Sa kabila nito, magpapatupad naman ang Presidential Security Group (PSG) ng security adjustment at assessment para masiguro ang seguridad ng Pangulo sa gitna ng banta ng BIFF.
Sinabi naman ni Presidential Spokesman Ernesto Abella, hindi siya nagpahayag ng anumang pagkabahala sa bantang ito ng BIFF sa Pangulong Duterte.
Katunayan nga daw ay walang ground support partikular sa Muslim community na nakukuha ang naturang grupo kaya ipaubaya na lamang sa militar ang pagtugon dito.
Magugunita na nagsagawa ng pag-atake ang BIFF kamakalawa sa Pigcawayan, North Cotobato kung saan ay sinira pa ng mga ito ang larawan ni Pangulong Duterte at nagsulat sa blackboad ng paaralan na kanilang pinasok ng mga mura laban sa Pangulo.
Iginiit pa ni Gapay na walang kinalaman sa Marawi crisis ang ginawa ng BIFF sa Pigcawayan at hindi ito spillover ng Marawi incident na inilunsad naman ng Maute.
- Latest