6 iskul sa Marawi, wasak sa bomba
Anim na pampublikong paaralan sa Marawi City ang hindi na mapapakinabangan makaraang mawasak dahil sa bomba matapos gawing kuta ng Maute. AP/File
MANILA, Philippines - Anim na pampublikong paaralan sa Marawi City ang hindi na mapapakinabangan makaraang mawasak dahil sa bomba matapos gawing kuta ng Maute.
Ayon kay DepEd Sec. Leonor Briones, sa oras na matigil ang armed confict sa Marawi ay kailangang isailalim sa total rehabilitation ang anim na paaralan.
Sinabi ni Briones, matatagalan pa bago tuluyang maitayo ang mga gutay-gutay na paaralan kaya siya umaapila sa publiko at malalaking kumpanya na mag-donate muna ng mga tent at school desk o upuan na maaaring pansamantalang magamit ng mga estudyante sa oras na mag-resume ang klase sa Marawi.
Sa ngayon ani Briones, ay ginagawa nila ang lahat ng paraan upang muling maipagpatuloy ng mga batang bakwit ang kanilang pag-aaral.
Tiniyak din ni Briones na tuloy-tuloy pa ring ibibigay at matatanggap ng mga guro sa Marawi City ang kanilang suweldo sa kabila ng suspension ng klase.
Una dito ay nanawagan si Briones sa publiko na mag-donate ng tsinelas, sapatos at iba’t-ibang uri ng school kits na maaaring magamit ng mga estudyante.
Tinatayang nasa 20,000 mag-aaral sa mga pampublikong paaralan sa kinder, elementary at high school sa Marawi ang nangangailangan ng tulong.
- Latest
