Leni kay Aguirre: Sinungaling, nakakatakot
Sinabi ni Aguirre ngayong Miyerkules na ang panggugulo ng Maute terror group sa sentro ng lalawigan ng Lanao del Sur ay parte ng destabilisasyon sa administrasyong Duterte. AP file photo
MANILA, Philippines -- Binatikos ni Bise Presidente Leni Robredo si Justice Secretary Vitaliano Aguirre matapos idawit ang ilang senador sa pamamagitan ng fake news.
Sa isang talumpati, tinukoy ni Robredo ang naging pahayag ni Aguirre sa media kung saan nagpakita siya ng isang lumang larawan upang idawit sina Sens. Bam Aquino at Antonio Trillanes IV sa gulo sa Marawi City.
"Meron tayong Department of Justice na iyong head, may mga sinasabing hindi totoo. Tingin ko nakakatakot iyon kase iyong Department of Justice dapat sya iyong nangunguna na sinisiguro na di ba? Iyong parang, parang iyong justice will prevail over all of us," wika ni Robredo.
"Kapag iyong mga sinasabi niya hindi totoo, nawawala iyong tiwala ng tao sa institusyon mismo. Hindi lang naman ito sa kanya, pero sa institusyon," dagdag niya.
BASAHIN: Trillanes, Aquino, Alejano may kinalaman sa Marawi siege - Aguirre
Pinaimbestigahan ng kalihim ang umano'y pagpupulong nina Aquino, Trillanes, dating Political Affairs Secretray Ronald Llamas at Magdalo party-list Rep. Gary Alejano kasama ang mga lokal na mga opisyal ng lungsod ng Marawi noong Mayo 2.
Ipinagtataka ni Aguirre na nangyari ang pag-atake sa Marawi matapos ang naturang pagpupulong.
Una nang pinabulaanan ni Aquino ang mga paratang ni Aguirre at hiningian ng public apology ang Justice secretary.
“The Justice Secretary should simply apologize and take responsibility for his reckless accusations,” pahayag ni Aquino.
Bigla namang kumambyo si Aguirre at dinahilan na na-misquote lamang daw siya ng media.
"For the record, I did not say there was a meeting between the two families and some lawmakers prior to the Marawi siege. The said meeting never took place and no member of both families ever met with Senator Trillanes, Congressman Alejano, and Ronald Llamas," paliwanag ni Aguirre.
Mariing itinanggi ng National Union of Journalists of the Philippines ang dahilan ni Aguirre.
“You lie when you claim you were 'misquoted' when you lied about the fictitious meeting between opposition politicians and prominent Marawi clans that you then attempted to portray as a prelude to the continuing battle between government forces and extremist gunmen," pahayag ng grupo.
Una nang naging kontrobersyal si Aguirre matapos nitong idawit si Sen. Leila de Lima sa insidente ng Resorts World kung saan 38 tao ang namatay.
- Latest
