Kuwestiyon sa Martial Law dalhin sa SC
MANILA, Philippines - Pinayuhan ni Justice Secretary Vitaliano Aguirre II ang mga kritiko ng Martial Law sa Mindanao na makabubuting dumulog sa Korte Suprema at kuwestiyunin ang legalidad nito.
Umani ng sari-saring reaksyon ang pagdedeklara ni Pangulong Duterte ng Martial Law kung saan sinabi ng constitutionalist na si Christian Monsod, na ang nagaganap na labanan sa pagitan ng militar at Maute group sa Marawi City ay hindi maituturing na rebellion kaya’t walang dahilan upang magdeklara ng Batas Militar.
Ayon kay Aguirre, may hawak na report si Pangulong Duterte na maaaring hindi alam ng mga ordinaryong tao kaya’t nagpasya itong magdeklara ng Martial Law.
“The President is entitled to be presumed to be regularly performing the duties of his office,” ani Aguirre.
Ang lahat naman aniya ay maaring kumuwestiyon sa ginagawa ng Pangulo subalit kailangan lamang na ilagay sa tamang lugar.
Samantala, binigyan-diin naman ng Philippine Muslim Society, na hindi solution ang martial law sa halip ay maghihikayat pa sa mga kabataan na sumali sa terrorist groups.
Sa ilalim ng 1987 Constitution, maaaring magdeklara ng martial law ang Pangulo sa anumang panig ng bansa sa loob ng 60 na araw.
- Latest