4 sibilyan sugatan sa NPA harassment
MANILA, Philippines - Muli na namang naghasik ng karahasan ang mga rebeldeng New People’s Army (NPA) makaraang maglunsad ng serye ng harassment matapos na mamaril sa ilang CAFGU detachments kabilang ang isang malapit sa komunidad na ikinasugat ng apat na sibilyan sa Brgy. Geparayan, Silvino Lobos, Northern Samar kamakalawa.
Kinilala ang mga nasugatang sibilyan na sina Genalyn Tulin, 31 anyos, Jocelyn Tulin, 12 , Danica Tulin, 10 at Ruby Jane Tulin, 2 ; pawang mabilis na isinugod sa pagamutan para malapatan ng lunas.
Ayon kay Lt. Cherry Junia, Spokesperson ng Army’s 8th Infantry Division (ID), nasa 150 NPA rebels ang umatake sa CAFGU detachment sa nasabing lugar na sinunog pa ng mga ito.
Sinabi ng opisyal, tinangay rin ng mga rebelde sa kanilang pagtakas ang isang M60 rifle, isang R4A3, apat na carbine rifles, limang garand rifles at isang Harris handheld radio.
Samantala sa pagpapaulan ng bala at pangra-ransak sa nasabing CAFGU detachment ay ilan pang base ng mga militiamen ang pinaulanan rin ng mga nagsitakas na rebelde. Patuloy naman ang hot pursuit operations laban sa mga rebeldeng komunista na sangkot sa insidente.
- Latest