Duterte namumuro sa impeachment – Leila
MANILA, Philippines – “Bordering” na sa impeachment ang balak na pag-aabsuwelto ni Pangulong Rodrigo Duterte sa mga pulis na nasasangkot sa pagpatay sa gitna ng kampanya nito sa ilegal na droga.
Ginawa ni Sen. Leila de Lima ang pahayag matapos mapaulat na sinabi ni Duterte na hindi niya papayagang makulong ang mga pulis na sangkot sa pagpatay kay Albuera Mayor Rolando Espinosa Sr. kahit pa natuklasan ng NBI na rubout ang nangyari at hindi shootout.
Ayon kay de Lima, kinakasuhan pa lamang ng NBI ang mga sangkot na pulis ay mistulang pinapatawad na kaagad ang mga ito ng Pangulo.
Ipinaalala ni de Lima na ang pag-absuwelto sa mga akusado ay hindi trabaho ng Pangulo dahil nasa kamay ito ng hudikatura.
“Nagpa pardon na kaagad sya. Eto na naman, kinakasuhan pa lang ng NBI, pina pardon na naman nya. That’s tantamount to pardon, na inaabswelto na nya kaagad na and its not even his duty because the duty belongs to the judiciary, to the courts. So bordering na yan to impeachability eh,” ani de Lima.
Ipinaliwanag ni de Lima na maituturing na “betrayal of public trust” ang gagawing pagpapatawad ng Pangulo dahil trabaho nito na tiyakin na mapaparusahan ng batas ang mga nagkakasala.
Katungkulan din anya ng Pangulo na irespeto ang Konstitusyon at ang umiiral na “separation of powers” ng mga sangay ng gobyerno.
- Latest