Menosan na ang patay
Mahimong nakaamgo na si Presidente Rodrigo Duterte nga dili mahimo nga hangtod sa hangtod siya nga magpakabuta-bungol sa mga pagsaway gikan sa sulod ug sa gawas sa nasud batok sa iyang gubat sa ilegal nga drugas. Mahimo sab nga nakumbinser na siya sa mga naglibot kaniya nga lisud ipasabot kun magsige na lang sila og ihap sa mga patay’ng lawas sa gidudahang mga durugista nga mangligdas matag adlaw.
Mahimo sab nga nakaamgo na si Duterte nga dili diay mapahilom sa iyang inadlaw nga mga balikas ug mga panginsulto ang sibaw nga kabalaka sa Estados Unidos, European Union ug ubang mga institusyon sa pagsulbong sa extrajudicial killings (EJKs) sa unang mga adlaw sa iyang pamunoan.
* * *
Hagit karon sa kapolisan ang dakong kausaban sa direksiyon sa kampanya batok sa ilegal nga drugas. Batakang tahas sa bag-ong gilusad nga Oplan Double Barrel Alpha: Pagmenos sa dugo ug pag-usbaw sa dakop. Gikan sa agresibong mga engkuwentro nga kasagaran nisangpot sa pagkamatay sa suspetsadong mga durugista ngadto sa pagposas sa labing dagko ug inilang mga durugista.
Ang pagkabutyag sa bag-ong direksiyon sa kampanya wa magagikan sa tabian nga si PNP Director General Ronald “Bato” dela Rosa, kun dili, sa dili ingon ana katabian nga tigpamaba sa Malakanyang nga si Ernesto Abella. Dili sayon alang ni Dela Rosa ang pag-angkon nga mahimong may kasaypanan ang ilang nasugdan.
* * *
Sa labing uwahing opisyal nga ihap sa kapolisan, 3,878 na ang nangamatay sukad sa paglingkod ni Duterte sa Malakanyang: 1,725 ang napatay sa mga operasyon sa kapolisan; ug 2,153 ang gitawag sa Kampo Crame nga deaths under investigation (DUI), nga gitataw nila nga dili pa angay’ng tawgon dayon nga EJKs o vigilante killings.
Kun wa pa mausab ang direksiyon sa kampanya sa drugas, may sukaranan ang kabalaka nga mokapin na sa 6,000 ka patay’ng lawas ang mangligdas sa dili pa matapos ang tuig. Tungod sa Double Barrel Alpha segurong mapun-an ang 31,629 ka nadakpan nga buhi.
* * *
Mahimong nadutlan na sab ang pamunoang Duterte sa laing sibaw nga pasangil nga pulos mayukmok ray naigo sa gubat sa drugas. Kay dili ikalimod nga makabungog nga mayoriya sa mga gipangtumba sa Oplan Tokhang mao ang mga sakop sa labing ubos nga hut-ong sa katilingban.
Nipasalig ang Malakanyang nga ang puntareya sa bag-ong kampanya mao na ang mas dagkong target. Ambot may nahibilin pa ba nga drug lords nga wa pa mahatagi og immunity ni Justice Secretary Vitaliano Aguirre.
Ug ambot may adunahan pa ba nga mga negosyante nga gilambigit sa drugas nga wa pa ka-amen ni Duterte. Hinaot nga sa mosunod nga mga adlaw dili kita lingaw-lingawon lang og dinakpanay sa mga artista nga gipasanginlang mga durugista.
- Latest
