P300-M nawawala sa 2014 Bilibid raid
MANILA, Philippines – Nawawala umano ang may P300 milyong cash na nakuha sa raid sa New Bilibid Prison noong Disyembre 2014.
Inihayag ito ni Justice Secretary Vitaliano Aguirre II alinsunod na rin sa testimonya ng isang inmate at intelligence officer.
Taliwas naman ito sa unang report na P1.6 million cash lamang ang nakumpiska mula sa mga preso mula sa maximum security compound.
Ayon kay Aguirre, sinabi ng mga saksi na kasama sila sa pagsalakay noong Dec. 15, 2014 na pinangunahan ni noo’y Justice Secretary at ngayo’y Sen. Leila De Lima. Si De Lima ay inaakusahan ngayong sangkot sa bentahan ng iligal na droga sa NBP.
Sinabi ni Aguirre na iba ang deklarasyon nila de Lima kaya’t pinaiimbestigahan na rin nila ito sa NBI.
Giit ni Aguirre, dapat na maipaliwanag kung saan nanggaling ang nasabing halaga.
Matapos aniya ang pagsalakay ay inutos ni de Lima ang paglilipat sa 19 drug lords sa NBI.
Ilan sa mga ito ay tumestigo noong nakaraang linggo sa Kamara.
Tanging si Jaybee Sebastian lamang ang naiwan sa NBP kung saan mas lalo umanong namayagpag ang bentahan ng iligal na droga sa Bilibid.
Nakalikom umano si Sebastian ng pera mula sa drug money at ginamit umanong pondo sa election ni de Lima. Itinatanggi naman ni de Lima ang alegasyon.
- Latest