Panukalang proteksyon sa whistleblower, pinamamadali
MANILA, Philippines – Pinamamadali ni Kabayan Partylist Rep. Harry Roque ang kongreso sa pagpasa sa batas ng panukalang magbibigay proteksyon sa mga whistleblower.
Ang panawagan ni Roque ay kasunod ng conviction sa Sandiganbayan dahil sa kasong katiwalian ni Rodolfo ‘Jun’ Lozada, ang whistleblower sa NBN-ZTE deal.
Ayon sa Kongresista, napaka-ironic na ang malalaking tao na inakusahan ni Lozada na nasa likod ng anomalya sa NBN-ZTE deal kabilang sina dating pangulong Gloria Macapagal-Arroyo at dating Comelec Chairman Benjamin Abalos ay nakalaya na at kung sino pa ang nagbulgar ng katiwalian ay siya pang nakulong.
Sa ilalim ng House Bill 223 o Whistleblowers’ Protection Act ni Roque, bawal gantihan ng sinumang empleyado o nakatataas sa kanya ang whistleblower tulad ng paghahain ng mga kaso para takutin o patahimikin ito.
Paniwala ni Roque, na kung mapo-protektahan ang mga nagbubulgar ng maling gawain ay mapalalakas ang accountability at mababawasan ang corruption sa gobyerno at maging sa pribadong sektor.
Matatandaan na hinatulan ng Sandiganbayan si Lozada na makulong ng mula 6 hanggang 10 taon sa kasong graft na nag-ugat noong presidente pa ito ng Philippine Forest Corp.
- Latest