NSC meeting ‘very productive’ – Pimentel

MANILA, Philippines - Tinawag na “very productive at successful” ni Se­nate President Aquilino “Koko” Pimentel III ang kauna-unahang National Security Council Meeting sa ilalim ng administrasyon ni Pangulong Rodrigo Duterte na ginawa sa Malacañang kamakalawa.

 Ayon kay Pimentel, inabot ng mahigit sa limang oras ang pulong na nagsimula ng alas-3 ng hapon at natapos ng lampas ng alas-8 ng gabi.

Sa isang hiwalay na panayam, sinabi naman ni Justice Sec. Vitaliano Aguirre II na masaya at maayos ang atmosphere sa NSC meeting. Nagawa pa umano ni Duterte na magbiro at sinabing “maganda ang vice president natin.” Dumalo rin sa pulong si Vice President Leni Robredo.

 Samantala, sinabi ni Senator Panfilo “Ping” Lacson na may direksiyon, substance, consensus at unity of purpose ang NSC meeting.

Ayon naman sa Palasyo, walang pinal na desisyon na narating ang NSC meeting na dinaluhan ng mga dating pangulo ng bansa kung paano nito mareresolba ang kasunduan sa territorial issue sa West Philippine Sea (WPS) matapos magdesisyon ang Permanent Court of Arbitration (PCA) pabor sa Pilipinas, ayon kay Presidential Peace Adviser Jesus Dureza.

Sinabi ni Sec. Dureza sa Foreign Correspondents Association of the Philippines (FOCAP), inilatag lamang ang mga posibleng maging solusyon pero walang pinal na napagkasunduan kung ano ang dapat ipatupad.

“No decision yet but all options were put on the table to consider. I will not disclose what has been discussed otherwise we will be disclosing to all parties,” ani Dureza.  Malou Escudero/Rudy Andal