Fight IT tutulong sa NBI
MANILA, Philippines - Tutulong ang grupong Fight Illicit Trade (Fight IT) sa kampanya ng National Bureau of Investigation (NBI) laban sa smuggling at pagsugpo sa iba’t ibang uri ng ilegal na kalakalan sa bansa.
Ang suporta mula sa pribadong grupo ay tinanggap naman ni NBI Director Virgilio Mendez kasabay ng pagpahayag na malaking tulong ang anumang makakalap na intelligence report ng Fight IT laban sa mga illegal na kalakalan hanggang sa prosekusyon.
Ayon kay Fight IT Chairman Jesus Arranza, ang grupo ay makatutulong sa NBI sa pagbibigay ng mga intelligence/confidential information, data protection na kakailanganin sa imbestigasyon at pag-prosecute sa mga ilegalistang negosyante.
Dagdag pa ni Arranza, puwede rin silang makapagbigay ng logical assistance tulad ng paglalaan ng mga warehouses para maging imbakan sa mga makukumpiskang ebidensiya upang masigurong maipreserba ito hanggang sa makapagbaba ng hatol ang korte.
Layunin ng grupo na protektahan ang mga pangunahing industriya na naapektuhan ng illegal na kalakalan tulad ng bigas, asukal, mais, palm oil, tabako, bakal, semento, ceramic tile at iba pa.
Magsasagawa rin ng mga pagsasanay ang Fight IT para sa mga NBI personnel kung paano matukoy na peke ang mga produkto tulad ng mga sigarilyo, shampoos, cellphones at tablets.
- Latest