Kumpirmado: Robredo tatakbong VP ni Mar sa 2016

MANILA, Philippines – Pormal nang ipinakilala ni Liberal Party (LP) standard bearer Mar Roxas si Camarines Sur Rep. Leni Robredo bilang kaniyang running mate para sa nalalapit na eleksyon 2016.

Emosyonal na ipinakilala ni Roxas ngayong Lunes sa Club Filpino sa Greenhills, San Juan ang may bahay ng namayapa nang dating Interior Sec. Jesse Robredo.

“Kailangan ka ng daang matuwid, kailangan ka ng ating mga boss, kailangan ka naming lahat upang pag isahin ang mga reporma at magsiguro na maipagpapatuloy ito,” wika ni Roxas kay Robredo. “Kaming lahat ay nasa likod mo.”

Ilang buwan ding sinuyo ng LP si Robredo upang tumakbong bise presidente matapos tanggihan ni Sen. Grace Poe ang alok ni Roxas.

Pinasalamatan din ni Roxas ang dalawang babaeng anak ni Robredo sa pagpayag na tumakbo ang kanilang ina sa mas mataas na posisyon.

Makakalaban ni Robredo sina Sen. Francis Escudero, Sen. Antonio Trillanes at Sen. Alan Peter Cayetano.