PNoy itinangging nag-alok ng tulong kay VP Binay

MANILA, Philippines – Nilinaw ni Pangulong Aquino na hindi siya nag-alok ng tulong kay Vice-President Jejomar Binay nang mag-usap sila noong nakaraang linggo sa Malacañang.

Ayon sa Pangulo, hindi totoo ang pahayag ni Ca­vite Gov. Jonvic Remulla na siya ang nag-alok ng tulong kay Binay nang sila ay mag-usap ng bise presidente sa kanyang tirahan sa Bahay Pangarap sa loob ng mahigit 2 oras.

Aniya, si Binay ang mismong humingi ng pagkakataon na magkausap sila dahil sa iba’t ibang kontrobersya hinggil sa kanilang pamilya tulad ng hidden wealth na iniimbestigahan ng Senado at DOJ.

Wika pa ng Pangu­lo, mismong si Binay ang nagsabi sa kanya na masyadong dinadamdam ng kanyang maybahay na si Dra. Elenita Binay ang nangyayaring ‘paninira’ sa kanilang pamilya ng ilang kaalyado ng Pangulo sa Senado at DOJ.

“Tanggap ko na magkaiba tayo sa pulitika pero magkaibigan tayo,” ito daw ang binanggit ni Binay sa Pangulo nang mag-usap sila sa Bahay Pangarap.

“I did not offer help to him, he asked for advice. It was the VP who initiated the meeting,” dagdag ni PNoy.

Naunang sinabi ni PNoy na siniguro niya kay Binay na walang fabri­cation of evidence na ginagawa ang gobyerno laban sa kanya at nakakasiguro itong igagalang ang kanyang karapatan sa ginagawang imbestigasyon dito ng Ombudsman.