20% discount sa estudyante kahit walang pasok aprub na
MANILA, Philippines - Maaari nang mabigyan ng 20 porsiyentong diskwento ang mga estudyante sa lahat ng uri ng pampublikong sasakyan maging sa himpapawid at dagat man sa buong bansa kahit na araw na walang pasok.
Ito’y matapos aprubahan ng House Committee on Transportation ang House bill 8501 o granting student 20% on public transport utilities na inihain ni Quezon City 5th District Rep. Alfred Vargas.
Ayon kay Vargas, sa pamamagitan ng nasabing panukala ay mahihikayat din ang mga estudyante na lumahok sa academic, extra curricular at civic activities kahit na wala silang pasok gayundin ang pagbibigay ng konsiderasyon sa mga sumasailalim sa internships, training at iba pang aktibidad ng mga mag-aaral.
Sa ilalim ng panukala, ang mga estudyanteng hindi mabibigyan ng 20% diskwento ay maaring maghain ng kanilang reklamo sa Land Transportation Franchising Regulatory Board (LTFRB) para sa mga public transportation utilities maliban na lamang sa tricycles.
Sa Maritime Industry Authority (Marina) at Civil Aeronautics Board (CAB) naman kapag may kaugnayan sa sasakyang panghimpapawid at water public transportation utilities.
Maaari naman dumulog sa Department of Transportation and Communications (DOTC) kapag magrereklamo sa pamunuan ng Light Rail Transit at Manila Metro Rail Transit system.
Kukumpiskahin ang lisensya ng mga driver ng pampublikong transportasyon sa loob ng isang buwan sa first offense, dalawang buwan sa second offense at tatlong buwan sa third offense at multang P1,000 na hindi magbibigay ng 20% discount sa mga estudyante.
Pagmumultahin din ang mga operators ng sea/water o air public transportation utility dahil sa pagtanggi ng kanilang mga empleyado na hindi susunod sa nasabing panukala sakaling tuluyan na itong maisabatas.
- Latest
