‘Pasko ng Pagkabuhay ipagdiwang’

MANILA, Philippines - Nanawagan si ABAKADA Rep.Jonathan dela Cruz na ipagdiwang ngayong araw na ito ang Easter o Pasko ng Pagkabuhay ng Panginoong Hesukristo sa  pamamagitan ng pinainit na pananalig sa Kanya habang tinatahak nating lahat ang landas ng pag-ibig at pagpapatawad na inilatag Niya para sa Sangkatauhan.

Ayon kay Dela Cruz, bumangon mula sa kamata­yan ang Panginoong Hesus upang iligtas ang buong Sangkatauhan, hindi lang isa o iilan kundi tayong lahat sa kasalanan at pangunahan tayo sa daan patungo sa Kanyang kaharian.  

Wika Niya, ang pinakamaliit nating puwedeng magawa ay ang sundan Siya sa pamamagitan ng pagkakaroon ng buhay na tahimik, makatwiran at makatarungan.

Pinaalalahanan din ni Dela Cruz ang mga Pilipino na ang pagsunod sa mga utos at pangaral ng Diyos ang pinakamabisang solusyon sa lahat ng problema at krisis na kinakaharap ngayon di lang ng bansa kundi ng buong Sangkatauhan.

Wala anyang dapat gawin ang tao kundi isuko at ipaubaya sa Kanya ang lahat at Siya na ang bahala sa atin. Siya ang magdadala sa atin sa tunay na tamang landas. Hindi Niya tayo aabusuhin kailanman sa ating mga kahinaan.