EDITORYAL - Ang kaestrikto

Ang kasikat ni kanhi DENR Secretary Gina Lopez bisan sa kabag-o pa niya sa katungdanan, usa ka basehanan nga posibleng modaog siya kun mosalmot sa politika sa sunod nga eleksiyon, duha ka tuig gikan karon.

Gusto kaayo ang katawhan og opisyal nga estriktong mopatuman sa balaod, ilabi na og dili modawat og mga suborno. Kadtong mga tawo nga ang gilantaw mao ra ang kalamboan sa atong nasud.

Gihulagway nga estrikto si Lopez nga mipatuman sa mga balaod nga naglambigit sa environment dihang siya pa ang DENR Secretary ug mao kini ang rason nga gituohang nagtigum og dakong kantidad ang tagdumala og mga mining company aron gamiton nga dili ma-confirm ang appointment ni Lopez.

Diha nga giyam-iran lang sa Commission on Appointments (CA) ang pagkatudlo ni Lopez isip DENR Secretary, si Presidente Duterte mihulagway nga “money talks” nga nagpasabot nga basta ang kuwarta na gani maoy molihok, mahimong ang prinsipyo dili na mopatigbabaw.

Gitudlo ni Presidente Duterte si Lopez tungod kay sulod sa mga lima ka oras nila nga panaghinabi kaniadto, iyang nasuta nga daghan kini og mga maayong programa sa pagpalambo sa atong kalikupan.

Tuod man, gikampanyahan ni Lopez ang mga mining company, apil na sa Surigao, nga nakahatag og kadaot sa kadagatan. Gipakita ni Lopez sa usa ka video nga ang dakong bahin sa kadagatan sa Surigao nahimo na nga mura’g dugo tungod sa mga hugaw gikan sa minahan.

Tungod sa aktibong kampanya ni Lopez, iyang naani ang kasilag sa mga nagdumala og mga minahan. Kun si Lopez mahimo nga politiko, sama sa pagka senador, mahimong dili kaayo siya makalihok kay kun may balaudnon nga gusto niyang ipatuman, mag-agad man gihapon kini sa kabubut-on sa kadaghanan sa iyang mga kauban.

Ang nindot nga buhaton ni Duterte mao unta ang pagtudlo pagbalik ni Lopez sa katungdanan nga ang iyang kaestrikto kapahimuslan.