EDITORYAL - Lugak nga balaod
Tungod sa lugak nga balaod sa Pilipinas, mahulog nga walay kapuslanan ang pagpaninguha sa National Bureau of Investigation (NBI) pagdakop sa tulo ka Romanian national nga gituohang responsable sa pagpangawat og kuwarta gikan sa Automated Teller Machines (ATM) sa Land Bank.
Gipasakaan na tuod og kaso sa piskaliya ang mga dinakpan, apan ang ilang mga kaso kun mapasaka na sa hukmanan mahimo ra nga mapiyansahan aron makagawas ang mga akusado sa bilanggoan samtang magpadayon pa ang paghusay sa ilang mga kaso.
Kun ang maong mga Romanian national makagawas na gikan sa bilanggoan human makabutang og piyansa, walay makapugong kanila nga molayas sila gikan dinhi sa atong nasud. Ang Konstitusyon sa Pilipinas naghatag og katungod sa mga tawo pagsuroy ug paglangyaw sa laing kanasuran.
Ang Bureau of Immigration dili makapugong sa maong mga Romanian national kun tuyo nila nga mogawas sa nasud tungod kay dili man sila makaisyu og Hold Departure Order pagka karon nga wala pa sila makunbikto sa ilang mga kaso nga giatubang.
Sakit kaayo alang sa mga nabiktima sa ATM skimming kay dili sayon ang pagtigum og kuwarta, unya kawaton lang. Ang bangko dili moilis sa kinatibuk-ang kantidad sa salapi nga nakawat gikan sa mga nabiktima nila nga depositors.
Angay gyud unta nga usbon ang balaod ug estriktuhon nga kadtong mga langyaw nga makahimo og salaod dinhi sa Pilipinas, dili basta-basta nga tugotang makabiya sa nasud hangtod nga maresolbar na ang ilang kaso ug mamatud-an sila nga walay sala.
Dili ikalimod nga daghang kaso nga naglambigit og mga langyaw ang napadaplin lang kay dili kasugdan ang paghusay tungod kay ang mga akusado wala na dinhi sa nasud.
- Latest