Ang Larawan ipasalida sa US

CEBU, Philippines — Malipayong gipahibalo sa Sugbuanon nga direktor sa Ang Larawan nga si Loy Arcenas nga ipasalida ang maong pelikula sunod semana sa pipila ka mga sinehan didto sa Amerika.

Nasayran nga padayon nga gihisgotan og maayo ilabi na sa social media ang maong musical film  .

Ang maong proyekto nagbase sa A Portrait of the Artist as Filipino ni Nick Joaquin.

Nahimo usab kini nga kabahin sa 30th Tokyo International Film Festival. Nanghakot usab kini og mga pasidungog sa bag-ohay lang nga Metro Manila Film Festival, kini sama sa Best Picture, Best Musical Score, Best Production Design, ug  Gatpuno Antonio J. Villegas Cultural Award.

Sa pakighinabi ni Direk Loy sa The Freeman ug Banat News Hugyaw kagahapon, nipadayag kini nga wala niya damha ang mga pasidungog nga nadawat sa maong pelikula.

Nasayran nga nibakasyon siya sa laing nasud atol sa awards night sa MMFF.

“Dili gyud baya unta MMFF ang target sa pelikula, kay dapat sa mga school man unta ,”matud pa niya.

Nidayeg usab si Direk Loy sa mga bitoon sa maong pelikula gumikan kay tulin gyud ang dagan sa ilang shooting.

Ang maong pelikula gibitoonan nila ni Joanna Ampil, Rachel Alejandro, Paulo Avelino, Cris Villonco, Aicelle Santos, Nonie Buencamino, Menchu Lauchengco-Yu, Rayver Cruz, Ogie Alcasid ug Zsa Zsa Padilla. Si Ryan Cayabyab ang nag-arrange sa music sa maong pelikula. Ang singer nga si Joanna maoy napili nga best actress sa MMFF 2017.